官場裡無真心, 任何政客也是為突出自己而各盡努力, 成功得民心者往往是銷售高手, 空有一股熱誠一個立場是難以立足。
眼見一些政客"為反對而反對", 個人認為是一種不甚建樹的突出自己行為, 這是我為何對民主黨毫無好感的原因。不過2004年立法局比例代表制選舉失利後, 他們也看似明白自己的策略在經濟好轉時候是行不通, 近年已較為靜了下來。但沒有"為反對而反對"這個招數, 又突顯他們組織能力低的這個弱點, 完全捧不到接班人出來, 靠的只可以是在2007年還希望重新運用1989年超級過氣上位招數復活過來的過氣老人。
公民黨給人的感覺很好。余若薇處處顯出智慧及良心, 一位成功的政客; 梁家傑在本年初的特首選舉雖很戲子佬的感覺, 但處變不驚又顯出大將風範, 確確實實比三大黨派背景的大部份人來得形象建立成功。(我仍是最喜歡即將退任的范太, 喜歡她在立局大叫長毛安靜下來的那個微笑...)
香港雖然還未有一人一票的的雙普選, 但下月一人一票一議席的港島區立法局補選卻是一個很令人興奮的項目, 很有可能是香港史上投票率最高的選舉。合資格的參選者雖有8人, 但大家的焦點還是前高官對前高官, 鐡娘子對鐡娘子(抄自今期亞洲周刊封面標題)。港島區是民主派勢力範圍, 有說泛民支持的陳太若不能得到80%的支持率即是贏了也是輸(很難吧, 今早看的支持率民意調查是陳--41%/葉--35%)...... 我的意見是陳太今次由泛民力撐走出來, 對她個人來說已是輸了一仗...... 葉太處於平常心對關於對手的提問處處中立不作回應, 陳太卻屢次主動狂攻, 講多錯多(退休後干政已是不對, 還主動對傳媒說出來??!! 多番事件, 已令我真懷疑她是否開始年紀大而不能先想好而行動, 昔日光環有點不再...)
我沒有投票權, 不然也會去玩玩。(為何我住的那區的大小選舉永遠也是毫無趣味???!!!)
Sunday, November 4
官場裡無真心
Friday, November 2
幸福生活十事
題目是"你認為構成幸福生活中不可缺少的, 是以下哪10項呢?" , 這個借來的抽樣調查最終有60人投票, 得出了以下的結果。
首五位的票數很接近, 基本上是眾望所歸的幸福生活必需品, 全部得到70%投票者的支持。
第1位
伴侶
46票 (76%)
這個排名第一, 正常不過吧...
第2位
上網電腦
45 (75%)
連葉太也沉迷FACEBOOK,
沒有電腦網上世界, 大家已不生存...
第3位
家人(父母仔女)
43 (71%)
也差不多, 但比上網電腦來得次一點...
可能沒有太多朋友有子女, 也不是跟父母同住...
第4位
藝術品(包括CD/DVD etc.)
42 (70%)
林先生的格言:「一開心買CD, 一傷心買CD!」
第4位
坐廁
42 (70%)
踎廁真的不可以嗎?
第6位
圖書
37 (61%)
無論是張小孄還是張五常、心靈雞湯或是方太靚湯, 沒有幾個人是可在欠缺書本下生存的...
......得票50%以上
第7位
相機
32 (53%)
人、事或物, 任何曾發生出現的東西, 也是需要有實在的映像作為回憶... "我對眼就係證據!"不是時常適用...
第7位
冷氣機
32 (53%)
嘩, 沒有冷氣會不能入睡... 也是習慣吧, 16歲前也是過著沒有空調的日子。
第7位
電視
32 (53%)
就算對有線或無線的頻道沒興趣, 放DVD時也需要它...
第10位
手機
31 (51%)
現在也已是沒有手機不能生存的年代..... 哈哈, 以住昔日預備大量一元硬幣、排隊使用公共電話的日子實在有趣得很...
其他.......
...得票30%以上
11.鏡子 23 (38%)
12.浴缸 19 (31%)
...得票20%以上
13.植物 17 (28%)
14.有海景的房子 16 (26%)
15.寵物 13 (21%)
...得票10%以上
16.私家車 8 (13%)
17.家居電話 7 (11%)
17.鄰居 7 (11%)
17.Now TV/Cable TV 7 (11%)
20.電飯煲 6 (10%)
20.外傭 6 (10%)
...得票10%以下
22.結婚相(跟情人的合照) 4 (6%)
22.健身器材 4 (6%)
另有10位朋友投了"其他東西"一項。根據留言, 這包括了"首先要身體健康..收入ok..有好的朋友"及"音響一部,俾我日日播八十年代舊歌" .....
當然幸福東西還有很多東西是很重要是我忘了放在投票選擇中, 而"它們"的票數又應會是不低的, 例如"健身會藉"、"化粧護膚品"、"閨中密友"、"酒肉朋友"......等等。
Wednesday, October 31
三人分別先後辭職の巻
最終, 同事A及同事B也在這兩三天交了辭職信。
三人同時分別辭職, 老闆們不知所惜。原因, 我們全都說是已忍受不了神經阿嬸的種種行為...
昨夜, 小老闆以"炒掉神經阿嬸"作條件, 希望我留下, 我拒絕了。理由是, 1)神經神嬸以她的學識、性格、年紀及裝扮, 實在不易再找到同等級的工作; 2)若老闆在這一刻炒了神經阿嬸, 她必定咒怨我一世; 3)其實我已有新工作的決定....... 拒絕的一刻真的不好受, 很對不起, 始終他們當初給了我這個機會。
老闆說炒掉一位工作兩年的同事也是痛心, 但她跟別人相處不來, 屢次令同事怕怕辭職避她(原來已有多位前人!)... 始終也是要她離去的, 不然這情況只會不斷重覆地發生。
其實早於三個月前開始, 我也已作出多番暗示明言, 這一天終會來臨, 只是大小老闆不覺得是大問題, 回答永是請忍耐一下請忍耐一下...... 今天你跟我們說神經阿嬸影響了整體公司的運作...這句話, 這數月間我跟你們說了最少也有五遍以上。一直只是要求作出少許關於大家的工作調動安排, 你們肯聽聽及有所新安排, 實在不會至這個地步....
小老闆今天改變對策, 辦公時間時叫了我們三人外出High Tea(這個舉動很不明智...), 說希望以"炒掉神經阿嬸"來換來同事A及/或同事B的留下。只要一人肯留下來, 也會即時炒了神經阿嬸...... 不過她們兩人也覺得很有機會被神經阿嬸打小人, 亦覺得斷了神經阿嬸的唯一米路實在過意不去, 堅定地一再婉拒了。
神經阿嬸, 我們也算對妳好, 最後也不斷妳的米路。不過妳要為自己好好打算了。
小老闆苦思後也想不到好好對策勸服同事A/B的留下, 便問大家會否介意今天讓神經阿嬸知道我們的離職... 同事A是阿嬸的"手下", 說想自己親口跟阿嬸先說。
返回公司後, 同事A竟然選擇了利用MSN來跟神經阿嬸說離職一事..... 同事A"親口說"的方法也相當神奇。
對話後, 神經阿嬸一直沒有說話......
時鐘踏正六時, 同事A/B如蛇般快速閃走, 我亦覺不宜久留, 向小老闆道別後閃身離去。
眼見神經阿嬸的極度黑面神情, 雖不知她在想什麼, 但我心裡起了可憐她的心。我們不是有心又是環境迫人亦是妳迫我們, 但始終也是無意間放了你在枱上, 心裡很過意不去。
不過, 這感覺很快消失了!!!!!
因為返回家後, 同事A的電話響起, 告訴了我她跟神經阿嬸在MSN的那番對話:
同事A: 阿嬸, 同你講聲我辭咗職
阿嬸: 只係你一個?
同事A: 唔係......
阿嬸: 你地去死啦, 你地有冇過份啲啊!!!
臭你的B! 白白浪費了我的"過意不去"!
反而, 最近兩天跟小老闆一席又一席談話後, 心裡同情他起來。決斷力不夠是他的弱項, 但始終還是一個老老闆, 一個神經阿嬸, 令到他與他的公司不能成長起來。真心希望這些問題(人物)終有一天能解決後, 只要遇上有心的員工落力幫忙, 要成功還不是沒有可能。
今次我幫不上忙, 對不起。
Tuesday, October 30
漢奸的樣貌
近日報章傳媒不斷出現關於李漢奸、陳漢奸及黎漢奸等等人物的報道...... 我不是想說他們的對與錯, 不過這令我對"漢奸"這件東西有點回想。
"色.戒"梁朝偉的易漢奸英俊不凡魅力四射, 跟張愛玲原著中所描繪的很不同。若跟足張愛玲的描繪, 朋友B說最適合的演員應是葛優。
三數年前, 剛進入一間公司當SALES, 大家同一屆訓練班的同學在初入職時都喜歡聚首一堂, 說是說非.....
同事J: 那個鹽西聰.... 都幾靚仔, 我諗佢咁好數一定靠美男計....
同事E: 我TEAM有位很高佻身材很勻稱的美女依沙貝, 佢咁好數唔知係咪都有出賣吓靈魂咁呢....
同事K: 不過, 那TEAM的那個乜乜七, 個樣成個漢奸咁都咁好數, 真係估佢唔到喎, 笑又笑得衰過人, 對眼以至全身都咁乞人憎....
同事E: 哈哈, 係呀, 佢真係成個漢奸咁, 點解有人會信佢0既....
DK: 嘻嘻... 佢真係成個漢奸咁款.....
原來有一款人, 是眾人也會覺得他擁有的是一個"漢奸"的樣貌, 無論他曾幹過什麼....
Monday, October 29
神經阿嬸の死妹釘の巻
去完洗手間回來, 收到同事B的MSN.......
同事B說: 証實咗佢真係痴線架!!! 你一出去,..佢就去斟水啦, 行過我後面2次, 講左2次死妹釘, 係勁細聲, 仲要扮到冇野咁..望第2度, 佢真係癲左啦
DK說: 唔係呀化??? 佢食緊乜呀?
同事B說:食屎, 哈, 食到xx聲...有病
DK說: 但佢係度食嘢喎, 佢唔係先啱啱篤完我9點後食嘢咩
同事B說: 唔知佢食乜==
DK說: 佢真係痴咗線, 上個月就篤我辦公時間食麵包, 依家就公然食嘢.... 精神分裂!!!
同事B: 快啲送佢去青山啦...危害人間!!!
神經阿嬸の晨早搶閘打咭發爛の巻
也不知為何天天也有新鮮事, 可能跟全公司所有人(除神經阿嬸外)也去意已決有關係, 已沒有人會對這位經常破口大罵的中年女士吞聲忍氣了......
"晨早搶閘打咭發爛の巻"
時間: 今天早上8時57分
地點: 辦公室外的走廊
因今天地鐡超級擠湧, 基本上到達每個車站時關門也要數次才能關上, 所以有點趕才能準時返回公司。走出電梯, 看到神經阿嬸蹲在地上努力以鎖匙開大門, 同事B則向我打了個眼色......
8時59分, 神經阿嬸依然開門失敗, 突然一聲不響站立起來面對牆壁.... 奇人奇事!!! 那我便接她的棒, 拿出鎖匙開門吧。
開門後, 我去開電燈開空調, 但卻看見走最後的神經阿嬸沒有把大門關上便衝了入公司!!!
關了門, 走至打咭機前便聽到神經阿嬸大罵同事B: 「你知唔知係唔可以幫同事打咭架!!! 」
同事B語氣也不大客氣:「點解唔得吖? Donald都返咗嚟, 佢去咗開冷氣之嘛...」
我心想, 我們之間互相幫忙打咭(當然對方是存在的!)已有數個月, 為何阿嬸直至今天才破口大罵呢? 一定有人"踩中佢條尾"......
果然, 神經阿嬸對同事B的反罵是...「你阻住我打咭就乜都唔得!!!」
哈哈, 望望打咭機上的時間 ... 8:59am ... 怪不得這樣緊張了... 上星期已有兩天遲到的她, 今天委實不可以又遲了。
(註: 打咭機的存在, 是因她向總公司報告同事經常遲到而設立的。但由始至終, 神經阿嬸也是遲到之冠...... 腦生草精神分裂的例證之一)
神經阿嬸繼續大罵同事B, 同事B亦發揮畢生精力應戰...... 噢! 已變成一場街市大罵戰了!
「最細又係你, 最冇規矩又係你! 呢度幾時輪到你講嘢呀!」神經阿嬸說了這一句之後, 我冷冷地道: 「年紀最大又有乜用吖.... 連做人道理都唔識...」
阿嬸: 我警告你, 你唔好成日年齡岐視喎, 你依家好後生呀?
DK: 起碼我識得點同人相處...
阿嬸: 你係咪男人嚟, 一啲Gentleman風度都冇?
DK: ......???!!! 你其實知唔知Gentleman風度係點解呢?
阿嬸: 你最叻就係擦鞋, 搞到兩個死靚妹企晒你嗰邊, 擦鞋呢家嘢我冇你咁本事!!!
同事A回來打咭後幫口說: 唔係咁樣架....
阿嬸: 你收聲!!!
同事B: 你快啲去睇醫生啦, 你有精神病!
阿嬸: 你地全部去睇醫生就真啊! 你係咪男人嚟, 成日幫住啲妹妹仔, 我"鄧"你阿媽慘, 生咗過咁0既仔出嚟!
DK: 你真係快啲去睇醫生, 唔係你個女真係會都好慘....
阿嬸: 你做乜講我屋企人呀? 你係咪男人嚟?? 鬧人就鬧人啦, 做乜拉埋人地屋企人嚟講!
.
.
.
真係痴咗線! 再唔走我都會痴埋一份!
Thursday, October 25
神經阿嬸掟杯實錄
本以為已辭職, 只要不聞不問世事, 便可避免再跟神經阿嬸有任何瓜葛...... 怎知道本日又有好戲上演 --- 神經阿嬸掟杯發脾氣實錄。
首先要解釋三件事。
1)神經阿嬸是責任推卸是遠近馳名的, 有功自己領, 有鑊第一時間扮無知推卸給別人揹鑊, 即使那人是她的下屬。
2)神經阿嬸極愛權力, 還喜歡稱跟她的同事A是她的"手下", 同事B是Donald的"手下"。
3)日語文法中, "我", "你"兩字在說或寫方面也是可以不使用的, 利用動詞的變化及助詞的選用便可表明說的是"他"是"你"還是"我"。
例:
Xさんが工場と交渉しています。 = X小姐正在跟工廠商談中。 (2 Parties)
Xさんと工場と交渉しています。 = 我正在跟X小姐及工廠商談中。 (3 Parties)
今天上午10時多....... 故事開始>>>
阿嬸: 你點解成日都係咁? 先斬後奏, 你做乜嘢都唔同我商量!
同事A: 乜事?
阿嬸: 我叫你咁樣做, 你又唔咁樣做, 你有冇當過我係你上司? 依家連EMAIL都SEND埋俾客, 乜都返唔到轉頭啦.....
同事A: 你叫我直接SEND個加價通知書俾客, 我實俾客鬧死, 我只係先SEND一個話有可能會加價的EMAIL俾客, 等佢有心理準備, 咁我地真係有同個客FIGHT過可唔可以平啲嘛, 事先話聲佢知, 我今晚會SEND埋個通知書俾佢.... 個客之前都鬧我話我地公司成日決定晒啲嘢先話佢知, 冇喺佢立場諗吖嘛.....
阿嬸: 佢鬧你之嘛, 依家唔鬧得吖? 我不嬲都咁做, 你係手下, 就要依我的指示做啦, 依家乜都返唔到轉頭啦...
同事A: 如果我淨係乜都聽晒你講, 我咪只係一個木偶...... 咁我都係想個客舒服啲, 都唔想佢又鬧到我"笈"我電話啫...
阿嬸: 你咁講, 我做你上司即係冇意思啦, 即係我冇價值啦... 依家邊個係上司?邊個係手下? 我最唔中意你先斬後奏! 最唔中意你SEND EMAIL前唔俾我睇!
同事A: 咁我之前問你駛唔駛SEND之前俾你睇, 你又話CC俾你得.....
(嚟啦!!!!!!)
阿嬸: 咁你做乜寫埋我個名落去吖? 你SEND EMAIL又唔係我SEND, 又唔見你寫自己個名! 你寫我個名入去, 咪即係我要負責任? 你做乜唔寫埋自己個名入去吖?
同事A: 我寫"Xさんと工場と交渉しています。", 如果我寫"が"而唔係"と", 咁就話係你同工廠傾啫, 但我寫"と"喎, 即係我都有份啦.... 其實都係你同工廠傾之嘛, 我都講埋我都有份咯....
阿嬸: 唔係咁解, 你唔寫你個名入去, 人地點知你都有份, 咁點解唔淨係寫你個名落去呀小姐, 你分明玩嘢啦! 知唔知乜都尊重? 我做得你上司, 你做乜都要俾我睇過, 你寫我個名唔寫你個名就係唔尊重我係你上司!
同事A: 如果你當自己係我上司, 我問你嘢你就教我點做啦, 唔係成日叫我自己睇紀錄自己學啦... 同埋你係我上司0既話, 就應係幫我諗辦法點同客人講, 唔係俾人鬧的就我去做, 咁.... 其實你有乜做?
阿嬸: 咩呀! 你係我手下, 我叫你做乜就做乜啦. 你寫我個名入去, 點解唔問過我.....
同事A: 唔係喎, 我用咗"と", 即係話我都有份.....
阿嬸: 你唔寫你個名人地就唔會知你都有份啦... 我唔明點解你要寫我個名入去....
(玩緊FACEBOOK PUZZLE的我終於拔刀相助!!!!!)
DK: 同事A 0既日文先係啱0既, 佢的用法真係已經講埋佢有份啦....
阿嬸: 點解我次次教訓手下你都要搭咀, 你知唔知我忍你忍咗好耐啦!!!!
DK: 你可以唔忍我喎... 同事A都係保護自己唔駛俾個客鬧得咁厲害, 先至分兩個EMAIL SEND出去之嘛... 你都做好多嘢嚟保護你自己啦...
阿嬸: ...... 做咩呀, 做乜幫住晒呀...
DK: 我都係講返件事... 同埋你真係可以唔駛忍我0既... 仲有同事A的日文表達方法係包括佢/你同工廠, 唔係淨係你同工廠.......
阿嬸: 你仲唔收聲喎!!!
(同事B加入戰圈內!!!!!!)
同事B: Donald都係講返件事咋喎, 同事A都係唔想俾客鬧之嘛...
阿嬸: 做乜呀? 三個圍攻我一個呀? 你地想點?
DK: 冇人圍攻你, 你冷靜一啲....
阿嬸: 都唔關你事, 我教手下你咁多事做乜?
DK: 都係你搞到公司咁嘈, 我先睇下發生乜嘢事啫....
同事A: Donald都係講事實啫.....
同事B: 你講嘢的語氣好少少都唔會發生咁大事啦.....
阿嬸: 明明好細件事, 你地中意攪大佢就攪大佢啦, 話知你地死......
收聲、掟杯、去廁所......
神經阿嬸以一連串動作結束了以上對話。